ကုမ္ပဏီ၏ ဝိသေသလက္ခဏာများ
[Characteristics of Company]

Separate Legal Entity
[ သီးခြားတရားဝင်အဖွဲ့အစည်းဖြစ်ခြင်း]

ကုမ္ပဏီသည် ကုမ္ပဏီတွင်ပါဝင်သူများနှင့် သီးခြားဖြစ်သော ဥပဒေက (Artificial Legal Person) လူအဖြစ် အသိအမှတ်ပြုထားသည့် အဖွဲ့အစည်းဖြစ်ပါသည်။ ကုမ္ပဏီသည် သီးခြားရပ်တည်မှုရှိသည့်အတွက် ကုမ္ပဏီနာမည်ဖြင့် ပဋိညာဉ်ချုပ်ဆိုခြင်း၊ ငွေကြေးချေးငှါးခြင်း ၊ ရပိုင်ခွင့်များကို ရောင်းချခြင်းနှင့်ဝယ်ယူခြင်းများကို ဆောင်ရွက်နိုင်ပါသည်။ ဥပဒေအရလူ (တစ်နည်း) တရားဝင်အဖွဲ့အစည်းဖြစ်သည့်အတွက် လူတစ်ဦးကဲ့သို့ တရားစွဲဆိုနိုင်သလို၊ တရားအစွဲဆိုခံရနိုင်သည်များလည်းရှိပါသည်။ ဥပဒေနှင့်အညီ စီးပွါးရေးလုပ်ငန်းများကိုလည်း လုပ်ကိုင်နိုင်ပြီး ဥပဒေအရ ပေးရန်တာဝန်ရှိသော အခွန်အခများကိုလည်း ပေးဆောင်ရပါသည်။ထို့အပြင် ဖျက်သိမ်းခြင်း သို့မဟုတ် မှတ်ပုံတင်ခြင်းမှပယ်ဖျက်ခြင်းမရှိသ၍ တရားဝင်ဆက်လက်ရပ်တည်နေမည်ဖြစ်သည်။

Limited Liability
[ တာဝန်ကန့်သတ်ထားခြင်း]

ဤနေတွင် တာဝန်ကန့်သတ်ထားခြင်းဆိုသည်မှာ ပေးရန်တာဝန်များကို ကန့်သတ်ထားခြင်းကိုဆိုလိုသည်။ ကုမ္ပဏီတွင်ပါဝင်သူများ တစ်နည်း ကုမ္ပဏီ၏ အစုရှယ်ယာရှင်များသည် ကုမ္ပဏီဖျက်သိမ်းသည့်အခါဖြစ်စေ၊ ဆုံးရှုံးမှုတစ်စုံတစ်ရာကြုံသည့်အခါဖြစ်စေ ငုင်းတို့ထည့်ဝင်ထားသည့် အစုရှယ်ယာပမာဏာ အထိသာပေးရန်တာဝန်ရှိပါသည်။ ပေးရန်တာဝန်ကန့်သတ်ထားမှုအပိုင်းသည် အခြားသော စီးပွါးရေးပုံစံများနှင့် အဓိကကွာခြားမှုအပိုင်းဟု ဆိုနိုင်ပါသည်။ တစ်ဦးတည်းပိုင်လုပ်ငန်းများ၊ အစုစပ်လုပ်ငန်းများသည် ပေးရန်တာဝန်ကန့်သတ်မထားပါ။ လုပ်ငန်းတွင် ဆုံးရှုံးမှူပေါ်ပေါက်ပါက ပေးရန်တာဝန်ရှိသည်များအတွက် မိမိတို့၏ ပုဂ္ဂလိကပိုင်ဆိုင်မှုများအထိ သက်ရောက်မှုရှိနိုင်ပါသည်။ အခြားနိုင်ငံများတွင် တာဝန်ကန့်သတ်သည့် အစုစပ်လုပ်ငန်းများအား ( LLP - Limited Liability Partnership) ဖွဲ့စည်းလေ့ရှိကြသော်လည်း မြန်မာနိုင်ငံတွင် အဆိုပါပုံစံအတွက် ဥပဒေပြဌာန်းချက်မရှိသေးပါ။

Perpetual
[ စဉ်ဆက်မပြတ်တည်ရှိခြင်း ]

ကုမ္ပဏီသည် ပါဝင်သူများနှင့် သီးခြားဖြစ်သည့်အဖွဲ့အစည်းဖြစ်သည့်အတွက် အစုရှယ်ယာရှင်များသေဆုံးခြင်း ၊ အပြောင်းအလဲဖြစ်ခြင်းသည် ကုမ္ပဏီ၏ဖြစ်တည်မှုအပေါ်တွင်သက်ရောက်မှုမရှိပါ။ ကုမ္ပဏီသည် ဥပဒေအရဖြစ်ပေါ်လာသည့် သတ်မှတ်ချက် ( Legal Fiction ) ဖြစ်သည့်အတွက် ကုမ္ပဏီ၏ ဖြစ်တည်မှုကို အဆုံးသတ်လိုသည့်အခါ ဥပဒေပြဌာန်းချက်များအတိုင်းသာ အဆုံးသတ်ရပါသည်။ မှတ်ပုံတင်စာရင်းမှပယ်ဖျက်ခြင်း နှင့် စာရင်းရှင်းလင်းဖျက်သိမ်းခြင်းများပြုလုပ်ခြင်းဖြစ်သည်။ ထို့ကြောင့် “ A Corporation does not die : it must be killed “ ဟုပင်ညွှန်းဆိုကြပါသည်။